Luftmensch

Qui voudra voir comme Amour me surmonte,
Comme il m’assaut, comme il se fait vainqueur,
Comme il r’enflame et r’englace mon cueur,
Comme il reçoit un honneur de ma honte,

Qui voudra voir une ieunesse pronte
A suivre en vain l’obiet de son malheur,
Me vienne lire : il voirra la douleur,
Dont ma Deesse et mon Dieu ne font conte.

Il cognoistra qu’Amour est sans raison
Un doux abus, une belle prison,
Un vain espoir que de vent nous vient paistre:

Et cognoistra que l’homme se deçoit,
Quand plein d’erreur un aveugle il reçoit
Pour sa conduite, un enfant pour son maistre.